วตฺตํ อปริปูเรนฺโต, น สีลํ ปริปูรติ;
อสุทฺธสีโล ทุปฺปญฺโญ, จิตฺเตกคฺคํ น วินฺทติฯ
[2950]
วิกฺขิตฺตจิตฺโตเนกคฺโค, สทฺธมฺมํ น จ ปสฺสติ;
อปสฺสมาโน สทฺธมฺมํ, ทุกฺขา น ปริมุจฺจติฯ
[2951]
ตสฺมา หิ วตฺตํ ปูเรยฺย, ชินปุตฺโต วิจกฺขโณ;
โอวาทํ พุทฺธเสฏฺฐสฺส, กตฺวา นิพฺพานเมหิติฯ
วตฺตกฺขนฺธกกถาฯ
ภิกฺขุนิกฺขนฺธกกถา
[2952]
กายํ อูรุํ ถนํ วาปิ, วิวริตฺวาน ภิกฺขุนี;
อตฺตโน องฺคชาตํ วา, ภิกฺขุสฺส น จ ทสฺสเยฯ
[2953]
ภิกฺขุนา สห ยํ กิญฺจิ, สมฺปโยเชนฺติยาปิ จ;
ตโต ภาสนฺติยา ภิกฺขุํ, โหติ อาปตฺติ ทุกฺกฏํฯ
[2954]
น จ ภิกฺขุนิยา ทีฆํ, ธาเรยฺย กายพนฺธนํ;
เตเนว กายพนฺเธน, ถนปฏฺเฏน วา ปนฯ
[2955]
วิลีเวน จ ปฏฺเฏน, จมฺมปฏฺเฏน วา ตถา;
ทุสฺสปฏฺเฏน วา ทุสฺส-เวณิยา ทุสฺสวฏฺฏิยาฯ
[2956]
น ผาสุกา นเมตพฺพา, ทุกฺกฏํ ตุ นเมนฺติยา;
น ฆํสาเปยฺย สมณี, ชฆนํ อฏฺฐิกาทินาฯ
[2957]
หตฺถํ วา หตฺถโกจฺฉํ วา, ปาทํ วา มุขมูรุกํ;
โกฏฺฏาเปติ สเจ ตสฺสา, โหติ อาปตฺติ ทุกฺกฏํฯ
[2958]
น มุขํ ลิมฺปิตพฺพํ ตุ, น จุณฺเณตพฺพเมว จ;
มโนสิลาย วาปตฺติ, มุขํ ลญฺชนฺติยา สิยาฯ
[2959]
องฺคราโค น กาตพฺโพ, มุขราโคปิ วา ตถา;
อวงฺคํ น จ กาตพฺพํ, น กาตพฺพํ วิเสสกํฯ
[2960]
โอโลกนกโต ราคา, โอโลเกตุํ น วฏฺฏติ;
ฐาตพฺพํ น จ สาโลเก, สนจฺจํ น จ การเยฯ
[2961]
ทุกฺกฏํ มุนินา วุตฺตํ, คณิกํ วุฏฺฐเปนฺติยา;
สุรํ วา ปน มํสํ วา, ปณฺณํ วา วิกฺกิณนฺติยาฯ
[2962]
วฑฺฒิํ วาปิ วณิชฺชํ วา, ปโยเชตุํ น วฏฺฏติ;
ติรีฏํ กญฺจุกํ วาปิ, ยทิ ธาเรติ ทุกฺกฏํฯ
[2963]
ทาโส วา ปน ทาสี วา, ตถา กมฺมกโรปิ วา;
น เจวุปฏฺฐเปตพฺโพ, ติรจฺฉานคโตปิ วาฯ
[2964]
น จ ภิกฺขุนิยา สพฺพ-นีลาทิํ ปน จีวรํ;
ธาเรตพฺพํ, น ธาเรยฺย, สพฺพํ นมตกมฺปิ จฯ
[2965]
ปฏิจฺฉนฺนาปฏิจฺฉนฺนํ , ฉินฺนํ วาจฺฉินฺนเมว วา;
ปุริสพฺยญฺชนํ สพฺพํ, โอโลเกตุํ น วฏฺฏติฯ
[2966]
ทูรโตว จ ปสฺสิตฺวา, ภิกฺขุํ ภิกฺขุนิยา ปน;
มคฺโค ตสฺส ปทาตพฺโพ, โอกฺกมิตฺวาน ทูรโตฯ
[2967]
ภิกฺขุํ ปน จ ปสฺสิตฺวา, ปตฺตํ ภิกฺขํ จรนฺติยา;
นีหริตฺวา ตมุกฺกุชฺชํ, ทสฺเสตพฺพํ ตุ ภิกฺขุโนฯ
[2968]
สํเวลฺลิกญฺจ กาตุํ วา, ธาเรตุํ กฏิสุตฺตกํ;
อุตุกาเล อนุญฺญาตํ, อุตุนีนํ มเหสินาฯ
[2969]
อิตฺถิโปสยุตํ ยานํ, หตฺถวฏฺฏกเมว วา;
ปาฏงฺกี จ คิลานาย, วฏฺฏเตวาภิรูหิตุํฯ
[2970]
ครุธมฺเม ฐิตายาปิ, มานตฺตํ ตุ จรนฺติยา;
สมฺมนฺนิตฺวา ปทาตพฺพา, ทุติยา ปน ภิกฺขุนีฯ
[2971]
ยสฺสา ปพฺพชฺชกาเล ตุ, คพฺโภ วุฏฺฐาติ อิตฺถิยา;
ปุตฺโต ยทิ จ ตสฺสาปิ, ทาตพฺพา ทุติยา ตถาฯ
[2972]
มาตา ลภติ ปาเยตุํ, โภเชตุํ ปุตฺตมตฺตโน;
มณฺเฑตุมฺปิ อุเร กตฺวา, เสตุํ ลภติ สา ปนฯ
[2973]
ฐเปตฺวา สหเสยฺยํ ตุ, ตสฺมิํ ทุติยิกาย หิ;
ปุริเสสุ ยถาญฺเญสุ, วตฺติตพฺพํ ตเถว จฯ
[2974]
วิพฺภเมเนว สา โหติ, ยสฺมา อิธ อภิกฺขุนี;
ตสฺมา ภิกฺขุนิยา สิกฺขา-ปจฺจกฺขานํ น วิชฺชติฯ
[2975]
วิพฺภนฺตาย ยถา ตสฺสา, ปุน นตฺถูปสมฺปทา;
คตาย ติตฺถายตนํ, ตถา นตฺถูปสมฺปทาฯ
[2976]
เฉทนํ นขเกสานํ, ปุริเสหิ จ วนฺทนํ;
วณสฺส ปริกมฺมมฺปิ, สาทิตุํ ปน วฏฺฏติฯ
[2977]
น วจฺจกุฏิยา วจฺโจ, กาตพฺโพ ยาย กายจิ;
เหฏฺฐาปิ วิวเฏ อุทฺธํ, ปฏิจฺฉนฺเนปิ วฏฺฏติฯ
[2978]
น จ วฏฺฏติ สพฺพตฺถ, ปลฺลงฺเกน นิสีทิตุํ;
คิลานายฑฺฒปลฺลงฺกํ, วฏฺฏตีติ ปกาสิตํฯ
[2979]
น จ ภิกฺขุนิยารญฺเญ, วตฺถพฺพํ ตุ กถญฺจน;
อติตฺเถ นรติตฺเถ วา, นฺหายิตุํ น จ วฏฺฏติฯ
[2980]
สมณี คนฺธจุณฺเณน, ยา จ วาสิตมตฺติยา;
นฺหาเยยฺย ปฏิโสเต วา, ตสฺสา อาปตฺติ ทุกฺกฏํฯ
[2981]
‘‘ตฺวํเยว ปริภุญฺชา’’ติ, ปริโภคตฺถมตฺตโน;
ทินฺนํ อภุตฺวา อญฺญสฺส, เทนฺติยา ปน ทุกฺกฏํฯ
[2982]
สพฺพํ ปฏิคฺคหาเปตฺวา, ภิกฺขูหิ ปริภุญฺชิตุํ;
อสนฺเตนุปสมฺปนฺเน, ภิกฺขุนีนํ ตุ วฏฺฏติฯ
ภิกฺขุนิกฺขนฺธกกถาฯ
อิติ วินยวินิจฺฉเย ขนฺธกกถา นิฏฺฐิตาฯ
จตุพฺพิธกมฺมกถา
[2983]
จตฺตาริมานิ กมฺมานิ, อปโลกนสญฺญิตํ;
ญตฺติ ญตฺติทุติยญฺจ, กมฺมํ ญตฺติจตุตฺถกํฯ
[2984]
อปโลกนกมฺมํ ตุ, ปญฺจ ฐานานิ คจฺฉติ;
ญตฺติกมฺมํ นวฏฺฐานํ, ทุติยํ สตฺต คจฺฉติฯ
[2985]
ตถา ญตฺติจตุตฺถมฺปิ, สตฺต ฐานานิ คจฺฉติ;
นิสฺสารณญฺจ โอสาโร, ภณฺฑุกํ พฺรหฺมทณฺฑโกฯ
[2986]
อปโลกนกมฺมญฺหิ, กมฺมลกฺขณปญฺจมํ;
นิสฺสารณญฺจ โอสารํ, สมณุทฺเทสโต วเทฯ
[2987]
ภณฺฑุกํ ปพฺพชนฺเตน, ฉนฺเนน พฺรหฺมทณฺฑกํ;
อญฺญสฺสปิ จ กาตพฺโพ, ตถารูปสฺส ภิกฺขุโนฯ
[2988]
สพฺโพ สนฺนิปติตฺวาน, อาปุจฺฉิตฺวาน สพฺพโส;
จีวราทิปริกฺขารํ, สงฺโฆ ยํ เทติ ตสฺส หิฯ
[2989]
ติกฺขตฺตุํ อปโลเกตฺวา, ภิกฺขูนํ รุจิยา ปน;
เอวํ สงฺฆสฺส ทานํ ตุ, โหติ ตํ กมฺมลกฺขณํฯ
[2990]
นิสฺสารณมโถสาโร , อุโปสถปวารณา;
สมฺมุติ เจว ทานญฺจ, ปฏิคฺคาโห จ สตฺตโมฯ
[2991]
ปจฺจุกฺกฑฺฒนตา เจว, อฏฺฐมี ปริกิตฺติตา;
กมฺมสฺส ลกฺขณญฺจาติ, นว ฐานานิ ญตฺติยาฯ
[2992]
วินิจฺฉเย อสมฺปตฺเต, เถรสฺสาวินยญฺญุโน;
ตสฺส นิสฺสารณา วุตฺตา, ยา สา นิสฺสารณาติ หิฯ
[2993]
อุปสมฺปทาเปกฺขสฺส, อาคจฺโฉสารณาติ สา;
อุโปสถวเสนาปิ, ปวารณวเสนปิฯ
[2994]